واضح رہے کہ اسلام میں کسی دوسرے کا مال اس کی اجازت کے بغیر لینا یا استعمال کرنا جائز نہیں، چاہے وہ چیز معمولی ہو یا بظاہر بیکار لگ رہی ہويا اس كے خراب ہونے كا اندیشہ ہو، نبی کریم ﷺ کا فرمان ہے کہ کسی مسلمان کا مال اس کی خوشی کے بغیر حلال نہیں۔
صورت مسئولہ میں فیکٹری کے ذمہ داران یا مالک کی طرف سے ان اشیاء کے لیجانے کی ملازم کو صراحتا یا دلالتا اجازت نہيں ہے تو اس كے لیئے بغیر اجازت کے ان اشیاء کو گھر لیجانا یا اپنے استعمال میں لانا جائز نہیں ۔
لہذا رف پیپر ہو یا اور کوئی چیز ہو جب تک مالک یا کمپنی کے دیگر ذمہ داران اسے اسکے لینے کی اجازت نہ دیں، تب تک وہ اسی کی ملکیت رہتی ہے،اس لیے خراب یا پرانی ہونے کے باوجود اسے بغیر اجازت گھر لے جانا جائز نہیں،البتہ اگر ہر مرتبہ اجازت لینا مشکل ہو تو ایک مرتبہ کلی اجازت لینا بھی کافی ہے ۔
لما في مشكاة المصابيح:
وعن أبي حرة الرقاشي عن عمه قال: قال رسول الله صلى الله عليه وسلم ألا تظلموا ألا لا يحل مال امرئ إلا بطيب نفس منه.
(باب الغصب والعارية،الفصل الثاني(١/٤٤٣)ط:البشرى)
ترجمہ:ابوحرہ رقاشی اپنے چچا سے روایت کرتے ہیں، انہوں نے کہا، رسول اللہ صلی اللہ علیہ وآلہ وسلم نے فرمایا سن لو! ظلم نہ کرو، کسی مسلمان کا مال اس کی خوشی کے بغیر حلال نہیں۔
